Авӑн уйӑхӗн 25-мӗшӗнче Вӑрнар районӗнчи Мӑн Явӑш ялӗнче 57 ҫулти арҫынна вӗлернӗ. Ку преступленине кӳрши тунӑ тесе шутлаҫҫӗ, ӑна тытса чарнӑ.
Хайхискерсем темиҫе ҫул вӑрҫӑнса пурӑннӑ-мӗн. Ҫак арҫын хӑйӗн пахчи патне машинӑпа пырайман, мӗншӗн тесен кӳрши ӑна хупласа лартнӑ. Ҫав кун вӗсем каллех хирӗҫсе кайнӑ.
Арҫын ҫӗҫӗ ярса тытнӑ та кӳршине темиҫе хутчен чикнӗ. Лешӗ ҫавӑнтах вилсе кайнӑ. Кӑна вара следовательсем тытса чарнӑ.
Шупашкар районӗнчи Чаканар ялӗ ҫывӑхӗнчи пӗвере арҫын виллине тупнӑ. Ку авӑн уйӑхӗн 24-мӗшӗнче кӑнтӑрла пулнӑ.
Пӗвен юхса тухмалли пӑрӑхӗнче арҫын виллине курсан ҫынсем шыравпа ҫӑлав службине шӑнкӑравласа пӗлтернӗ. Ҫӑлавҫӑ гидротум тӑхӑнса пӑрӑха 10 метр шала кӗнӗ те арҫын виллине илсе тухнӑ. Халӗ ку ӗҫ тӗлӗшпе полици ӗҫлет, мӗн пулса иртнине уҫӑмлатаҫҫӗ.
Аса илтерер: нумаях пулмасть Вӑрнар районӗнчи нурӑс ялӗ ҫывӑхӗнчи пӗвере те арҫын виллине тупнӑ.
Ҫунана ҫулла, урапана хӗлле хатӗрлемелле. Паян ҫакӑн пирки «Газпром межрегионгаз Чебоксары» организаци ертӳҫи Кияметдин Мифтахутдинов аса илтернӗ. Вӑл журналистсене пресс-конференцие пхнӑ. Унта газ укҫипе парӑмлисем пирки сӑмах хускатнӑ.
Ӑшӑпа тивӗҫтерекен организацисен компани умӗнче парӑмлӑ тесе пӗлтерет пресс-конференцие хутшӑннӑ Валентина Багадерова журналист. Элӗк, Вӑрнар, Красноармейски, Хӗрлӗ Чутай, Сӗнтӗрвӑрри, Пӑрачкав, Ҫӗрпӳ, Шупашкар, Ҫӗмӗрле, Етӗрне районӗсен тата Улатӑр, Канаш, Шупашкар, Ҫӗмӗрле хулисенче парӑм виҫи уйрӑмах пысӑк иккен.
Ӗнер, авӑн уйӑхӗн 16-мӗшӗнче, Станислав Отрыванов инженер-строитель, краевед, Чӑваш халӑх академийӗн чӑн пайташӗ пурнӑҫран уйрӑлнӑ. Вӑл 72 ҫулта пулнӑ, Шупашкарта пурӑннӑ.
Станислав Гурьевич 1948 ҫулхи утӑ уйӑхӗн 17-мӗшӗнче Вӑрнар районӗнчи Нурӑс ялӗнче ҫуралнӑ. Вӑл 38 ҫул Ҫурҫӗрти строительство организацийӗсенче ӗҫленӗ, Архангельск хула администрацийӗн мэрийӗнче те тӑрӑшнӑ. Таврапӗлӳҫӗ, очерксем тата прозӑлла хайлавсем ҫырнӑ.
Станислав Отрывановпа Шупашкарти П. Лумумба урамӗнчи 10-мӗш ҫуртра ыран, авӑн уйӑхӗн 18-мӗшӗнче, 11 сехетре сывпуллашӗҫ.
Вӑрнарти 1-мӗш шкулта юсав ӗҫӗсем вӑхӑтра вӗҫленмен, ҫавна май 817 шкул ачи парта хушшине ларайман. Кӗҫӗн классем хальлӗхе кивӗ шкулта вӗренеҫҫӗ, хӑш-пӗр вӗрентекен вара дистанци мелӗпе ӑс пухать.
ЧР Элтеперӗн тивӗҫӗсене вахӑтлӑх пурнӑҫлакан Олег Николаев Вӑрнар районне ҫитнӗ. Шкулпа ҫыхӑннӑ лару-тӑрӑва вӑл «Вӑрнарти пушар» ят панӑ, район администрацийӗн пуҫлӑхне хӑйӗн ирӗкӗпе ӗҫрен кайма сӗннӗ. Сӑмах май, Леонид Николаев ку должноҫре 2011 ҫултанпа ӗҫлет.
Паян Вӑрнар районӗн пухӑвӗн депутачӗсем Леонид Николаева отставкӑна яма йышӑннӑ. Подрядчик тӗлӗшпе вара административлӑ ӗҫ пуҫарас ыйтӑва пӑхса тухаҫҫӗ.
Иртнӗ эрнере Чӑваш Енре комбайн, утӑ упрамалли вырӑн ҫунса кайнӑ. Ку инкексем Пӑрачкав, Вӑрнар тата Патӑрьел районӗсенче пулнӑ.
Ҫурла уйӑхӗн 26-мӗшӗнче Пӑрачкав районӗнче тырӑ выракан «Нива» комбайн мӑкӑрланма тытӑннӑ. Техника харпӑр фермер хуҫалӑхӗн пулнӑ. Комбайн уйра тырӑ вырнӑ чухнех ҫунма пуҫланӑ. Пушарнӑйсем 1 гектар ҫинчи тыр-пула сыхласа хӑварнӑ.
Тепӗр кун Вӑрнар районӗнчи Чӑрӑшкас Мӑрат ялӗнче 61 ҫулти арҫыннӑн хуҫалӑхӗнче утӑ упрамалли вырӑн ҫуннӑ. Арҫын тӑррине газпа ҫунтармалли хатӗрпе усӑ курса юсанӑ. Пушарта 80 тонна утӑ ҫунса кайнӑ. Ҫывӑхри ҫурта ҫулӑмран сыхласа хӑварнӑ.
Ҫав кунах Патӑрьел районӗнчи Тутар Сӑкӑт ялӗнче те утӑ упрамалли вырӑн ҫуннӑ.
Вӑрнар районӗнче пурӑнакан 42 ҫулти арҫын суд сакки ҫине ларнӑ. Ун тӗлӗшпе приговор вуланӑ – ӑна тӗрмене хупмасӑр 1 ҫул та 6 уйӑхлӑха айӑпланӑ.
Ҫак арҫын ватӑ тӑванне тимӗр костыльпе хӗненӗ. Шар курнӑ 73 ҫулти арҫын – унӑн ҫывӑх тӑванӗ. Ҫамрӑкки ватӑраххин сывлӑхне самай сиен кӳнӗ, сылтӑм аллине суранлатнӑ.
Арҫын хӑйӗн айӑпне йышӑннӑ. Суд унӑн 18 ҫул тултарман ача пуррине шута илсе судья ҫӳлерех асӑннӑ приговор кӑларнӑ. Приговор саккунлӑ вӑя кӗмен-ха.
Тӑван ҫӗршывӑн аслӑ вӑрҫинче ҫӗнтернӗренпе 75 ҫул ҫитнине халалласа тӗпе хурса «Советская Чувашия» хаҫат «Этот день мы приближали, как могли» (чӑв. Ҫак куна эпир май килнӗ таран ҫывхартнӑ) викторина ирттерессине эпир пӗлтернӗччӗ. Аса илтерер: пултарулӑх ӑмӑртӑвӗн авторӗ тата йӗркелӳҫи — журналист, Чӑваш Республикин культура тава тивӗҫлӗ ӗҫченӗ Александр Вражкин.
Республика историйӗпе шкул ачисенчен пуҫласа 80 ҫулхи ватӑсеп таранах кӑсӑкланни палӑрнӑ. Пуринчен чӑтӑмли тесе хаҫатҫӑсем Вӑрнар районӗнче пурӑнакан Роза Алексеева пенсионер тесе пӗлтернӗ. Вӑл хаҫат подшивкисене тӗплӗн тишкернӗ. Конкурсра пурӗ 18 ҫӗнтерӳҫӗ пулнӑ. Ҫав шутра пӗр тӑван Архиповсем те, Юрийпе Наталия, пур.
Вӑрнар районӗнче пурӑнакан 29 ҫулти арҫын тӑван мар пӗчӗк ывӑлне тӑтӑшах хӗненӗ. Ун тӗлӗшпе РФ Следстви комитечӗ пуҫиле ӗҫ пуҫарнӑ.
Следстви версийӗ тӑрӑх, кӑҫал ҫӗртме-утӑ уйӑхӗсенче ҫак арҫын, Хирпуҫ ялӗнче пурӑнаканскер, пӗрле пурӑнакан хӗрарӑмӑн пӗчӗк ывӑлне хӗненӗ. Ҫав самантсене вӑл ӳсӗр пулнӑ.
Арҫын 5 ҫулти арҫын ачана аллипе ҫапнӑ, урипе тапнӑ. Халӗ судпа медицина экспертизи ирттереҫҫӗ. Следователь вара арҫынна следстви вӑхӑтӗнче ирӗксӗр хӑварас ыйтӑва татса парать.
Чӑваш Енре пӗр талӑкра ҫичӗ хутчен пушар алхаснӑ. Улатӑр хулинче, Вӑрнар тата Елчӗк районӗсенче ҫӳп-ҫап ҫунтарнӑ чух инкек тухнӑ.
Пӳрт-ҫурт ҫуннӑ тӗслӗхсем те пур. Канаш районӗнчи Матькасси ялӗнчи Ҫӗнтерӳ урамӗнче ҫурҫӗр иртни 2 сехет ҫурӑра пушар алхасма тытӑннӑ. Мунча, пурӑнмалли ҫурт, хуралтӑсем кӗлленнӗ, кӳршӗсен ҫурчӗ сиенленнӗ.
Шупашкар районӗнчи Шешкенер ялӗнче пушарта мунча ҫивиттийӗ ҫуннӑ. Пушар сӑлтавне специалистсем палӑртӗҫ.
Ирхи 5 сехет тӗлӗнче Шупашкарти коллективлӑ пахчасенчен пӗринче дача ҫурчӗ хыпса илнӗ.
Ӗнерех Ҫӗрпӳ хулинче пушар тухнӑ. Каҫхи 6 сехетре унти Чапаев урамӗнче гараж ҫунма тытӑннӑ.
-3.7 °C